前晚收七點行出公司門口抬頭一望見到天上的一個奇景就係出現咗一張笑臉,咁啱我公司一個日本高層行入門口,他見我望住個天他也好好奇跟住望,我同他講係哈哈笑,他都跟住笑,我一路行一路望住個天我覺好得意,可惜冇相機影低佢,我初初以為只係我見到(因為我好鍾意望住個天),返到屋企係某forum上原來有好多人都留意到呢個現象,有喜歡天文的網友話係金星、木星同月亮最接近的現像,呢個現象只係得一晚,下次再有呢個現象會係五十年後,五十年後到時我未死都差唔多有九十歲,再睇報紙原來美國果睇到嘅係笑面的相反即係扁咀,似乎正在顯露美國人而家的心情,雖然香港也唔好得幾多,但偶然有一些得意的東東來調劑一下心情都唔錯……

左邊較光的係木星,右邊的係金星,再加埋個灣灣的月亮就成了天上的笑臉

一連六日的林村打醮完結了,其實每晚放工即刻趕入去林村又攰又冇食野一路睇到散場真係幾辛苦,返到屋企已經十二點幾,拿拿臨食完飯沖涼搞到兩點幾至瞓,但上到床又瞓唔着喎,如是這…..呢幾日都係咁所以而家成個人都好攰~第一晚做春花笑六郎時凍親之後咳到我死死吓,果晚真係好凍,我估當時只得幾度,一路睇一路震,連嘉鳴姐都好似凍親,係最後果幕把聲開始出唔到,我本來以為係個mic的問題,後來有同事睇完正誕果日話我知嘉鳴姐失聲了,由於唔知道可以影相所以冇帶相機,唉!真失策…….

第二晚做蝶影我更加欲哭無淚,蝶影係我其中一套喜歡的戲,知道可以影相梗係帶相機啦,影到上半場(窺醉前)已經影咗好多相,見張記憶咭差唔多滿晒於是就換咭啦,點知就出事嘞,影咗好多相的4gb咭跌咗落個棚下面呀,我上半場影的相全部冇晒啦,雖然己經登記咗睇吓拆棚時搵唔揾得番,但相信搵番的機會係零,呢張咭之前係失而復得,但而家又得而復失,所以蝶影只影得下半場的相…..

第三晚帝女花又係我其中喜歡的一套,原本唔諗住去睇因為公司的女魔頭放完假番來,費事第二日唔夠精神做嘢比佢鬧鬼我,但最後我都決定去睇咗一陣,呢晚爆棚人太多D人行來行去又坐到三十幾行(前三日都係)所以影的相都唔靚,所以睇完痷遇、相認就走了…….

第四晚係正誕做紫釵記,對這齣戲唔感冒,加上想休息一日,所以冇睇雖然可以坐到去第六行……..

第五晚係俏潘安,正呀!可以影好多相,最後兩晚同樣爆棚,有好多人係後面走上前影相,排滿走廊兩邊場面好勁,蓋暉暉最後果幕以花旦裝扮出場搞到D觀眾嘩嘩聲,個個都讚佢靚,但我個人就麻麻嘞,可能係化咗個文武生的粧加花旦的裝扮所以有少少怪怪地…..哈哈哈條眉好粗….我都係喜歡佢做番文武生多D…..

第六晚係唐明皇,一個字靚,人靚、衫靚、佈影靚,原本BB仔搵我上鳴記,但我又要返工,佢又OFF兩日索性叫佢入林村,佢本來唔想去仲話不如買飛睇仲好,但我就話戲幾時都可以睇,但相就唔可以成日影,今次可以影下次未必得,況且有免費飛睇咁都唔睇就笨啦…..講番今次有免費飛睇真係要再一次多謝偉玲姐,如果唔係佢都影唔到咁多相….

睇蝶影時其實坐到三十行左右仲要較則位置,影相時仲要用到十幾倍變焦’影到咁己經算唔錯,可惜的係我上半場的相冇晒T-T!

我幾鍾意睴睴扁咀的表情實在係好可愛!

花旦的舉止較文静,所以影花旦比較容易!

做帝女花當晚人太多又坐得後,我覺得呢場乞屍係影得最好!

唔知點解我覺得呢張相好有形!

美英演俏潘安的醉酒同唐明皇的醉酒唔同,一個樣子儍儍的,一個就高貴美艷!

呢張我比國內的fans睇,佢地睇完後個個噴血中話羨慕美英!

呢張相影得好曚,但倆人的表情就好搞笑

唐明皇的衫同影真係好靚!

美英在唐明皇的醉酒,係唔係美艷D呢?

暉暉呢個姿勢坐得好形!

做齊人真係唔易,睇睇暉暉的表情就知!

呢場靚就靚嘞,但時光時暗好難影!

影到呢場我的手已經好攰,開始手震,所以都有十幾張影到好曚!

我鍾意夢會呢場的美英,好靚o架!

昨晚係我細妹的大日子,個個都玩得好開心,親戚朋友在晚宴上差不多全部到齊,昨日朝早我地成家人加埋表弟大緯緯七點半就起身,由於前晚個個都差唔多四點至瞓所以每個人都帶住個黑眼圈,之後就街食早餐,食完早餐我兩個細佬同表弟就去攞西餅同唐餅兼買一些飲品,而我老媽同細妹則到街市買玫瑰花準備來做頭飾,而我則返家執屋掃地,踏正九點化粧師candy就好準時到我屋企幫我細妹化粧,到十點幾我的親戚細妹的姊妹同伴娘陸陸續續都來到好熱鬧,親戚就坐係度傾計而班姊妹則化粧同準備玩新郎的道具有日本芥辣、棉花糖、jelly同愛的宣言等……等到差唔多十二點多新郎就到,玩一輪遊戲,佢地玩遊戲時好好笑,尤其是讀愛的宣言果時笑到肚痛,第二次讀時姊妹要求新郎用國語讀出但新郎唔識國語用咗一D唔知咩語言讀出,我姑姐同班兄弟都話佢讀到成個陳水扁咁樣,由於時間緊迫所以立即拜神同敬茶之後就出門去男家,而我地就落酒樓食lunch,食完lunch等佢地回門但等咗好耐都唔見,差唔多成四點至到,由於四點要到酒樓所以我地成家人同我的表妹亞儀要飛的士去,去到已經有d賓客正在大戰四方城,但個新郎同新娘架車仲未到,所以就入新娘房換衫先之後個化粧師就幫我化粧,講真我咁大個人第一次化粧,心諗唔知出來的效果會係點只希望唔會太差,差唔多化完對新人至到,跟住就由化粧師的助手幫我set頭,個心又再諗唔知幫我set個咩頭,其實我希望佢將我前面的陰斜梳(因為我喜歡某年蓋暉暉的斜梳髮型,我覺得好靚,想佢地幫我整一個),最後個助手好似知我心諗咩咁真係幫我斜梳,再配合埋個粧正呀,係我set頭途中聽到個妹話坐簽名處的幾位姊妹仲未到所以冇人坐簽名處,好彩有我大細佬同表妹亞儀頂住檔先,唔知點解果晚我地女家的親戚個個都好早到,我set完化完粧都係大約五點,行出新娘房己經見到好多親戚正在大戰,佢地見到我個個都望我,連個攝影師都問點解我同朝早果時爭咁遠嘅?你咁我係潤我呀,我承認朝早果時係好“烏were”睇番D相都覺得自己好核突成個顛婆咁,因為我朝早掃地抹地執屋又要執晚宴嘅野搞到連換件衫都冇時間仲邊得閒搞塊面同個頭,所以果晚成晚比人望住又成晚比人拉住影相,主角唔得閒影D新戚就拉住我,哈哈,好似做咗第二主角咁,到咗八點半婚禮加晚宴就開始,食到一半就敬酒同玩抽奬…..抽中的大部份係女家的人個個都好開心,食到我都唔知幾多點婚宴就完,之後幫個妹執好d東東再換埋衫,而出面嘅人就埋單就走了,返到屋企差唔多一點最後搞到成四點至瞓!

上星期六係我妹妹過大禮的日子,佢地舉行咗一個非常簡單而唔隆重的儀式,佢地用包羅萬有利是代替完全冇氣氛可言,所以我都讚成有些儀式必須保存下來,其實以前嘅人有過大禮的儀式都係想大家開開心心熱熱鬧鬧咁,邊度好似而家咁乜都簡化架………….

當晚有好多親戚都有到好熱鬧呀,我地係酒樓訂咗兩圍食飯,我的亞姨同兩個姨丈好high,亞姨兩夫婦一路唱K,而我大姨丈則一路跳舞,最後搞到連我老豆都high埋個人solo咗首“賣身契”我望望坐係我身旁的準新娘佢都係度笑,我最細的舅父行埋嚟同我個妹講“我等你呢餐等咗十年啦!”,我個妹則回應細舅父“我等呢餐咗二十年啦!”真係恨嫁得佢呀,當日我的幾個姑姐、姨媽同表妹都有送禮物比佢,我都買咗條金手鏈比佢,我條手鏈係托我同事偉玲姐幫我買的,因為佢的老公係金行做的所以會平D,而條手鏈個款都係佢老公幫我揀的,連我老媽都話靚,其實我幫襯偉玲的老公都有原因,因為嚟緊十一月係林村棚戲我都要靠偉玲姐帶我入去至有免費戲睇,所以有生意都比佢做先,而另一個原因就係佢老公做的金行就連蓋暉暉的媽咪都幫襯的,佢地仲成日傾計添,金行的職員都稱暉媽為李女士,佢地原本都唔知道李女士係暉暉的媽咪,後來一次傾計係暉媽自爆暉暉係佢個女至知,不過近幾年暉媽可能身體唔好所以冇再去傾計啦…….講番當晚完咗之後返到屋企小睡一陣時,當我瞓到矇矇矓矓時我老媽走入嚟突然問我今晚咁開心做咩唔影相呀?我冇理佢繼續瞓,本來我都打算影相嘅,但我就病到五顏六色,除了大傷風外我的左耳又發炎搞到塞住隻左耳完全聽唔到只有隻右耳聽到野,完全用隻右集中去聽所以當日佢地大大聲傾計同唱k時我都好辛苦,所以我仲有咩心情去影呀!第二日我同我老媽講番呢幾日其實我係病到五顏六色所以至唔幫手做,但佢竟然答“你唔想做所以揾借口唧!”我聽到之後真係覺得好hurt,連病都冇人信覺得自已好慘,唔通我連病的權利都冇呀?

尋晚先出完旺角攞番大嚿(FZ18的名)好彩冇事咋我都放心D,但我就黑仔一浪接一浪,尋晚至攞完部相機今日又發現我的手機的屏幕裂咗呢次手機個屏幕裂咗我唔整啦,用到爛為止反正我仲有部mo記未用,唔單止咁係今日我的腰骨痛(係腰同pp中間那處)又嚟搵我,一彎身就痛搞到我好似機械人咁,痛咗成日到食完晚飯連傷風都嚟同我say個hi,咁都未完食完飯返到屋企我由於腰骨痛加傷風搞到我好眼瞓,於是小睡幾個字(半個鐘都冇)瞓醒之後一行出房就比亞媽罵我唔做野,大佬呀我都想幫你做,但傷風令我好眼瞓腰骨痛就令到我好痛再加上身體其他部位亦好酸痛,我真係攰到唔識郁,佢鬧我果陣我火都嚟埋,我就鬧番佢做乜無啦啦揾我嚟鬧喎,唉!天呀!究竟我黑完未?

前日真黑仔,係電腦揀暉暉生日會D相去晒,揀吓揀吓都揀咗三百幾張,揀完之後諗住將D相copy落另一張記憶咭度點知彈句乜乜寫入程式保護,搞咗好耐都唔得唯有等星期六細佬返屋企搞搞佢,搞搞吓我又唔知做乜鬼(其實都係自己衰手多多)拎張空白的記憶咭搞吓張咭旁邊的Lock制,推一推佢點知成個Lock掣甩咗出來,因為我從未試過搞個Lock掣的以為咁樣係正常,於是攞我部愛機fz18試試係咪真係影唔到,試完真係影唔到於是就攞番張咭出來嘞點知咁就出事啦,張card有半張“cake”住咗在個記憶咭糟入面拎唔到出嚟呀又拉又扯連張咭整爛埋都唔得,搞到個card糟周邊磞咗又花咗我好心痛,因為我真係好鍾意部機架,今日放工後拎部機去整但要留醫一兩日,暫時整機的報價係百五銀,而家部機搞成咁張咭又報銷埋真係陪了夫人又拆兵,機呀機呀我發誓以後唔會對你再手多多希望部機冇事啦………………….

最近呢個星期屋企裝修所以冇寫blog,尋日我又要油油搞到好似冇放過假咁而家好攰,又執咗好多雜物去掉,總之呢兩個星期每次一放假就要執屋,好彩而家都搞到七七八八唔駛咁辛苦,做到夜晚就可以輕鬆一下就係打吓ps3,最近玩緊隻game幾好玩,係做一個生態攝影師,呢個game係sony同國家地理頻道合作的,而係game入面影咗的相可以放上電腦,可惜我唔識放,我想喜歡影相的人一定鍾意玩…….